ခွင့်လွှတ်ခြင်း
တခြားသူတွေကို ခွင့်လွှတ်ပေးခြင်းဆိုတာ... အချိန်တန်တဲ့အခါ ကိုယ့်ကိုယ်ကိုယ် ပြန်ပြီး ခွင့်လွှတ်နိုင်ဖို့အတွက် အကောင်းဆုံး လေ့ကျင့်ခန်းတစ်ခုပါပဲ။
________________________________________________________________________________
အေးအေးဆေးဆေး နေတတ်ခြင်းအပေါ် မှတ်စုတို
အေးအေးဆေးဆေး နေတတ်ခြင်း (Introversion) ဆိုတာ... လူအများနဲ့ ရောရောနှောနှော နေတတ်အောင် (Extroversion) လုပ်ပြီး ပြုပြင်ယူရမယ့် အရာတစ်ခု မဟုတ်ပါဘူး။ အဲ့ဒါကို ပြုပြင်စရာမလိုတဲ့ အရာတစ်ခုအဖြစ် မြင်ရုံနဲ့တင် သင်ဟာ ပြုပြင်ပြီးသား ဖြစ်သွားပါလိမ့်မယ်။
အေးအေးဆေးဆေး နေတတ်တဲ့ သဘာဝကို သူ့အတိုင်းပဲ ရှိနေခွင့် ပေးလိုက်ပါ။ အပြင်လောကကို ခြေလှမ်းလှမ်းသလိုပဲ... ကိုယ့်ရဲ့ အတွင်းစိတ်ထဲကို ပြန်လည်လှည့်ကြည့်တဲ့ ခရီးစဉ်တွေကိုလည်း ခွင့်ပြုပေးလိုက်ပါ။
___________________________________________________________________________
အနားယူခြင်းသည်လည်း လုပ်ဆောင်ခြင်းတစ်မျိုးပင်
မိတ်ဆွေ အနေနဲ့ အမြဲတမ်း အလုပ်ရှုပ်နေဖို့ မလိုပါဘူး။ သင် တည်ရှိနေရခြင်းရဲ့ အကြောင်းပြချက်ကို အလုပ် ဘယ်လောက်ပြီးမြောက်သလဲ ဆိုတဲ့ အချက်နဲ့ သက်သေပြနေဖို့ မလိုအပ်ပါဘူး။ အနားယူခြင်းဆိုတာ ရှင်သန်ရပ်တည်ရေးအတွက် မရှိမဖြစ် လိုအပ်တဲ့ အစိတ်အပိုင်းတစ်ခုပါ။ ကျွန်တော်တို့ရဲ့ ဖြစ်တည်မှုအတွက် အရေးပါတဲ့ အစိတ်အပိုင်းတစ်ခုပေါ့။ ကျွန်တော်တို့ဟာ လူသားဆိုတဲ့ တိရစ္ဆာန်တွေဖြစ်တဲ့အလျောက် အနားယူဖို့က မရှိမဖြစ် လိုအပ်ပါတယ်။
ခွေးတစ်ကောင် နေပူထဲမှာ လှဲနေတဲ့အခါ... သူ့ကိုယ်သူ အပြစ်ရှိတယ်လို့ ခံစားမနေဘူးလို့ ကျွန်တော် ထင်ပါတယ်။ ဘာလို့လဲဆိုတော့ ခွေးတွေဟာ သူတို့ရဲ့ လိုအပ်ချက်တွေကို သူတို့ကိုယ်တိုင် ပိုပြီး သိကြလို့ပါ။ ကျွန်တော် အသက်ကြီးလာလေလေ... အနားယူခြင်းဟာ တကယ်တမ်းမှာ ဘဝရဲ့ အဓိကအချက်ဖြစ်မယ်လို့ ပိုတွေးမိလာလေလေပါပဲ။
အိမ်ထဲမှာဖြစ်ဖြစ်၊ အပြင်မှာဖြစ်ဖြစ် ဘာမှမလုပ်ဘဲ ငြိမ်ငြိမ်လေးထိုင်ရင်း... နာရီလက်တံ သွားနေတဲ့အသံ၊ ဖြတ်သွားတဲ့ တိမ်တိုက်လေးတွေ၊ ဝေးလံတဲ့နေရာက ကားသံတွေနဲ့ ငှက်ကလေးတွေ သီချင်းဆိုသံတွေကို ဒီအတိုင်းလေး နားထောင်နေရတာဟာ သူ့ဘာသာသူ ပြည့်စုံတဲ့ ရည်မှန်းချက်တစ်ခု ဖြစ်နိုင်ပါတယ်။ အဲ့ဒါဟာ ကျွန်တော်တို့ အကျိုးရှိတယ် လို့ အတင်းသတ်မှတ်ခံထားရတဲ့ အလုပ်တွေထက်တောင် ပိုပြီး အဓိပ္ပာယ်ရှိနေနိုင်ပါတယ်။
တေးဂီတတစ်ခု သာယာဖို့အတွက် နုတ်စ် (Notes) တွေကြားမှာ ရပ်နားတဲ့နေရာ (Pauses) တွေ လိုအပ်သလိုပဲ စာကြောင်းတစ်ကြောင်း အဓိပ္ပာယ်ရှိဖို့အတွက် ပုဒ်ဖြတ်ပုဒ်ရပ် (Punctuation) တွေ လိုအပ်သလိုပဲ... ကျွန်တော်တို့ဟာ အနားယူခြင်း၊ ပြန်လည်သုံးသပ်ခြင်းနဲ့ ဆိုဖာပေါ်မှာ ငြိမ်ငြိမ်လေး ထိုင်နေခြင်းတွေကို ဘဝရဲ့ မရှိမဖြစ်လိုအပ်တဲ့ အစိတ်အပိုင်းတွေအဖြစ် မြင်သင့်ပါတယ်။ ဒါမှသာ ဘဝတစ်ခုလုံးဟာ အဓိပ္ပာယ်ရှိရှိနဲ့ လည်ပတ်နိုင်မှာ ဖြစ်ပါတယ်။
________________________________________________________________________
နက်နဲမှု
Mona Lisa ပန်းချီကားကနေ Middlemarch ဝတ္ထုအထိ... အချိန်ရဲ့ စမ်းသပ်မှုကို ခံနိုင်ရည်ရှိပြီး ကျန်ရစ်ခဲ့တဲ့ အနုပညာလက်ရာတွေကို စဉ်းစားကြည့်ပါ။ အဲ့ဒီလက်ရာတွေထဲမှာ အမြဲတမ်း အဖြေရှာလို့မရတဲ့ အချက် တစ်ခုခု ပါဝင်နေတတ်ပါတယ်။ ရာစုနှစ်ပေါင်းများစွာ ကြာတဲ့အထိ ဝေဖန်ရေးဆရာတွေက ဘယ်တော့မှ အဖြေမှန်မထွက်နိုင်တဲ့ အငြင်းပွားမှုတွေကို စိတ်အားထက်သန်စွာ ဆွေးနွေးနေကြရတဲ့ အချက်မျိုးပေါ့။
ဖြစ်နိုင်တာကတော့... ရှင်သန်ခြင်းရဲ့ အနုပညာဟာလည်း အဲ့ဒီလိုပါပဲ။ ဘဝရဲ့ ရည်ရွယ်ချက်ဆိုတာက အဲ့ဒီ နက်နဲမှု တွေရဲ့ အပြင်ဘက်မှာ ရှိနေတာမဟုတ်ဘဲ အဲ့ဒီ နက်နဲမှုကိုယ်တိုင်ကပဲ ရည်ရွယ်ချက် ဖြစ်နေတာမျိုးပါ။ ကျွန်တော်တို့ဟာ ကျွန်တော်တို့ဘဝရဲ့ အကြောင်းစုံကို သိနေဖို့ ဖန်တီးထားတာ မဟုတ်ပါဘူး။ အဲ့ဒီလို မသိဘဲနေရတာဟာလည်း လုံးဝကို အဆင်ပြေပါတယ်။
NEXT
Comments
Post a Comment