မျှော်လင့်ချက် ဒြပ်စင်များ
မြေ၊ ရေ၊ လေ၊ မီး။ အရာရာဟာ ချိတ်ဆက်နေတယ်။ စကြဝဠာထဲက အရာအားလုံးဟာ တခြားသော အရာအားလုံးနဲ့ သက်ဆိုင်ပတ်သက်နေပြီး။ ရူပဗေဒပညာရှင် ရစ်ချက် ဖိုင်းမန်း (Richard Feynman) က
"A ကို B နဲ့ လုပ်ထားတာ ဒါမှမဟုတ် B ကို A နဲ့ လုပ်ထားတာလို့ သင်ပြောလို့မရပါဘူး၊ ဒြပ်ထု (Mass) အားလုံးဟာ အပြန်အလှန် သက်ရောက်မှု (Interaction) တွေသာ ဖြစ်တယ်" လို့ ပြောခဲ့ဖူးတယ်။
ရုပ်ဝတ္ထုတွေအတွက် မှန်ကန်တဲ့ ဒီအချက်ဟာ ကျွန်တော်တို့ရဲ့ စိတ်ပညာနဲ့ ခံစားချက်တွေအတွက်လည်း မှန်ကန်နိုင်ပါတယ်။
နာကျင်မှုဟာ အချိန် ကနေတစ်ဆင့် ပျော်ရွှင်မှုနဲ့ ချိတ်ဆက်နေတယ်။ ပျော်ရွှင်စရာ ပစ္စုပ္ပန်ဟာ တဖြည်းဖြည်း ပြောင်းလဲသွားပြီး အမှတ်တရ ဖြစ်လာတဲ့အခါမှာတော့ ဝမ်းနည်းပူဆွေးမှုဆိုတဲ့ နာကျင်မှုနဲ့ ချိတ်ဆက်သွားပါတယ်။ ဒါပေမဲ့ အဲ့ဒီလိုပဲ... နက်ရှိုင်းတဲ့ စိတ်ပျက်အားငယ်မှုတွေရဲ့ အတွင်းပိုင်းမှာလည်း ပိုကောင်းတဲ့ အချိန်တွေရှိခဲ့ဖူးတယ်ဆိုတဲ့ အသိ ၊ ဒါမှမဟုတ် ပိုကောင်းတဲ့ အချိန်တွေ ဖြစ်လာနိုင်တယ်ဆိုတဲ့ အသိက မိတ်ဆွေကို အခက်အခဲတွေကြားကနေ ရုန်းထွက်နိုင်အောင် ကူညီပေးနိုင်ပါတယ်။
တစ်ခါတလေမှာ အဲ့ဒီ စိတ်ပျက်အားငယ်မှုတွေ ကြားထဲကနေတဆင့်တောင် ပျော်ရွှင်မှုကို ကျွန်တော်တို့ ရရှိနိုင်ပါသေးတယ်။ ဒါကို ကျွန်တော် ဘယ်လိုပြောရမလဲဆိုတာ သေချာဂရုစိုက်ရပါလိမ့်မယ်၊ ဘာလို့လဲဆိုတော့ ကျွန်တော်ကိုယ်တိုင်လည်း ဒါကို အပြည့်အဝ နားလည်ရဲ့လားဆိုတာ မသေချာလို့ပဲ။ ဒါပေမဲ့ စိတ်ဓာတ်ကျနေတဲ့ အချိန်တွေရဲ့ အတွင်းပိုင်းမှာ ကျွန်တော် သိရှိခံစားခဲ့ရတဲ့ ပျော်ရွှင်မှုမျိုး ရှိခဲ့ဖူးတယ်။ ဒါဟာ စိတ်ဓာတ်ကျဝေဒနာကို လျှော့တွက်တာ မဟုတ်ဘူးရယ်။ အဲ့ဒီဝေဒနာဟာ ပြင်းထန်လွန်းတယ်။ အသက်အန္တရာယ်ရှိတယ်။ အဲ့ဒါကြီးကို အဆုံးသတ်ချင်ခဲ့ပေမဲ့ ဘယ်လို ဘယ်တော့ အဆုံးသတ်မလဲဆိုတာ ကျွန်တော် မသိခဲ့ပါဘူး။
ဒါပေမဲ့... ဒါပေမဲ့လည်း... အဲ့ဒီလို ဖြစ်နေတဲ့အတွက်ကြောင့်ပဲတော့ မဟုတ်ဘူး။ အဲ့ဒီလို ဖြစ်နေလို့ကို ကျွန်တော်ဟာ အလှတရား ဒါမှမဟုတ် သက်သာရာရမှု အခိုက်အတန့်လေးတစ်ခုကို ကြုံတွေ့ရတဲ့အခါ အဲ့ဒီအရာဟာ အင်မတန် အစွမ်းထက်လာတာ။ ညဘက် ကောင်းကင်ယံကြီးဟာ အလှတရားတွေနဲ့ သီချင်းဆိုနေသလို ခံစားရတယ်။ အနမ်းတစ်ခု ဒါမှမဟုတ် ပွေ့ဖက်မှုတစ်ခုဟာ အဓိပ္ပာယ်တွေ အဆပေါင်းများစွာ တိုးလာတယ်။ အဲ့ဒါဟာ ကျွန်တော့်စိတ်ရဲ့ အပြင်ဘက်က ရှင်သန်မှုတွေက ကျွန်တော့်အတွင်းထဲမှာရှိတဲ့ ဖျက်ဆီးလိုတဲ့ အင်အားစုတွေကို သိရှိသွားပြီး အံ့သြဖွယ်ရာတွေနဲ့ ပြန်လည်တိုက်ဖျက်ပေးနေသလိုပါပဲ။
လူ့ခန္ဓာကိုယ်ထဲမှာ ကာဗွန်၊ အောက်ဆီဂျင်နဲ့ ဟိုက်ဒရိုဂျင် အမြောက်အမြားရှိနေတဲ့ကြားက ကြေးနီ၊ ဇင့် နဲ့ ရွှေ စတဲ့ ဒြပ်စင်အစအနလေးတွေ ပါဝင်နေတာကို စဉ်းစားကြည့်ပါ။ အဲ့ဒီလိုပါပဲ... ကျွန်တော်တို့ ကြုံတွေ့ခဲ့ရတဲ့ ဆိုးဝါးတဲ့ အတွေ့အကြုံတိုင်းကိုသာ ခွဲခြမ်းစိတ်ဖြာကြည့်မယ်ဆိုရင် အကြောက်တရားနဲ့ အားငယ်မှုတွေ အများကြီး ရှိနေတဲ့ကြားမှာ တခြားအရာလေးတွေရဲ့ အစအနလေးတွေကိုလည်း တွေ့ရပါလိမ့်မယ်။ အဲ့ဒါတွေကတော့ ကြည်နူးမှု၊ မျှော်လင့်ချက်၊ အချစ်နဲ့ ပျော်ရွှင်မှုတွေပါပဲ။ မှောင်မိုက်နေတဲ့ အချိန်မှာတောင် အသေးငယ်ဆုံးသော အလင်းစက်လေးတွေဟာ တောက်ပနိုင်တယ်။ ကျွန်တော်တို့ရဲ့ အာရုံကို ဖမ်းစားနိုင်တယ်။ နောက်ပြီး ကျွန်တော်တို့ကို အိမ်ပြန်လမ်းဖြစ်တဲ့ စိတ်အေးချမ်းရာဆီကိုတောင် လမ်းပြခေါ်ဆောင်သွားနိုင်ပါတယ်။
Comments
Post a Comment