ကိုယ်ကိုယ်တိုင် ဖြစ်အောင် ကြိုးစားပါ
တကယ်လို့ သင်က... သင်မဟုတ်တဲ့ တခြားအရာတစ်ခု ဖြစ်လာဖို့ ရည်မှန်းထားမယ်ဆိုရင်၊ သင်ဟာ အမြဲတမ်း ရှုံးနိမ့်နေပါလိမ့်မယ်။ သင့်ကိုယ်သင် ဖြစ်လာဖို့ပဲ ရည်မှန်းပါ။ သင့်ရဲ့ ပုံစံအတိုင်း မြင်တွေ့ရဖို့၊ သင့်ရဲ့ ပုံစံအတိုင်း ပြုမူဖို့နဲ့ သင့်ရဲ့ ပုံစံအတိုင်း တွေးတောဖို့ပဲ ရည်မှန်းပါ။
အဲ့ဒီ "သင့်ရဲ့ ဖြစ်တည်မှု" (You-ness) ကို ပွေ့ဖက်လိုက်ပါ။ အသိအမှတ်ပြုပါ။ မြတ်နိုးပါ။ ချစ်မြတ်နိုးပါ။ အဲ့ဒီအတွက်ကြောင့် လူတွေက သင့်ကို လှောင်ပြောင်ကြရင်လည်း... ဂရုကိုမစိုက်ပါနဲ့ (Don't give a fuck)။
____________________________________________________________________________
ဖလား
လူတွေက သင့်ကို ဘယ်လိုလူလို့ ထင်မှတ်နေကြမလဲဆိုတာအပေါ်မှာ သင့်မှာ ဘာထိန်းချုပ်နိုင်စွမ်းမှ မရှိပါဘူး။ ဒါကြောင့် စိတ်မပူပါနဲ့။ သူတို့ရဲ့ စိတ်ကူးထဲမှာ ဖန်တီးထားတဲ့ သင့်ရဲ့ ပုံရိပ်အမှား တစ်ခုကို သူတို့က မုန်းချင်နေတယ်ဆိုရင်လည်း... မုန်းပါစေ။
သင့်ကို နားမလည်ဖို့ တစိုက်မတ်မတ် ဆုံးဖြတ်ထားတဲ့သူတွေဆီမှာ... အနားမကပ်ပါနဲ့။ သင့်ကို နားလည်လာအောင် ရှင်းပြရင်းနဲ့လည်း ကိုယ့်ရဲ့ အင်အားတွေကို အကုန်မခံပါနဲ့။ သင့်ရဲ့ ဖလား(စိတ်စွမ်းအင်) ကိုပဲ ပြည့်နေအောင် ဂရုစိုက်ပါ။ နွေးထွေးကြင်နာမှုတွေ ရှိရာဆီကိုပဲ ဦးတည်သွားပါ။
__________________________________________________________________________
သလဲသီး
အတင်းအဖျင်းစကား အတော်များများဟာ မနာလိုစိတ်ကို အသွင်ပြောင်းထားတာပါ။ ကိုယ့်ကိုယ်ကိုယ် သံသယဝင်နေတာတွေ အတော်များများဟာလည်း အများနဲ့တူအောင် နေချင်စိတ် ကို အသွင်ပြောင်းထားတာပါပဲ။ "သင့်ရဲ့ ခွင့်ပြုချက်မပါဘဲ ဘယ်သူမှ သင့်ကို နိမ့်ကျတယ်လို့ ခံစားရအောင် မလုပ်နိုင်ဘူး" လို့ အီလီနော ရုစဗဲ့ (Eleanor Roosevelt) က ပြောခဲ့ဖူးပါတယ်။
ကိုယ့်ရဲ့ ဖြစ်တည်မှုထဲကိုပဲ အသက်ဝဝရှူသွင်းလိုက်ပါ။ အရိပ်ထဲကနေ အပြင်ကို ထွက်လာပါ။ အလင်းရှိရာမှာ သင့်ရဲ့ ပုံစံအတိုင်းပဲ ရပ်တည်လိုက်ပါ။ တကယ်တမ်း အရေးကြီးတဲ့ တစ်ခုတည်းသော အောင်မြင်မှုဟာ "ကိုယ့်ရဲ့ ပင်ကိုယ်ပုံစံအတိုင်း ဖြစ်တည်နိုင်ခြင်း" သာ ဖြစ်ပါတယ်။ အများနဲ့ အံဝင်ခွင်ကျ ဖြစ်နေတာက ပြဿနာမရှိပါဘူး။ ဒါပေမဲ့ အဲ့ဒီလို အံဝင်ခွင်ကျဖြစ်ဖို့အတွက် သင်မဟုတ်တဲ့ တခြားအရာတစ်ခုအဖြစ် ပြောင်းလဲရမယ်ဆိုရင်တော့ ဘယ်တော့မှ အတင်းဝင်မတိုးပါနဲ့။
သင်ကိုယ်တိုင် ဖြစ်လာအောင် ကြိုးစားပါ။ တခြားဘယ်သူနဲ့မှမတူတဲ့ လူတစ်ယောက် ဖြစ်လာပါစေ။ လူတွေက သင့်ကို မကြိုက်ဘူးဆိုရင်လည်း မကြိုက်ပါစေနဲ့။ သစ်သီးတိုင်းဟာ ပန်းသီးဖြစ်နေစရာ မလိုပါဘူး။ ဒီဘဝတစ်သက်တာလုံးကို တခြားသူတစ်ယောက်အဖြစ် ဟန်ဆောင်ရှင်သန်နေရတာဟာ အင်မတန် ပင်ပန်းလွန်းပါတယ်။
တကယ်လို့ သင်ဟာ သလဲသီး တစ်လုံး ဖြစ်နေတယ်ဆိုရင်... သလဲသီးတစ်လုံးအဖြစ်ပဲ နေထိုင်ပါ။ မှန်ပါတယ်... ပန်းသီးကို မကြိုက်တဲ့သူထက် သလဲသီးကို မကြိုက်တဲ့သူက ပိုများရင် များနေပါလိမ့်မယ်။ ဒါပေမဲ့ သလဲသီးကို ကြိုက်တဲ့သူတွေအတွက်တော့... သလဲသီးဟာ ကမ္ဘာပေါ်မှာ အကြိုက်ဆုံး အသီးတစ်မျိုး ဖြစ်နေမှာပါပဲ။
Comments
Post a Comment