19

အပိုင်း (၁၉)

“မမလတ်ပါ သားနဲ့ စကားပြောချင်လို့”

“ဟုတ်”

ငြိမ်းချမ်းအေးဆေးတဲ့ မမလတ် မောင်းတဲ့ ကားဘေးထိုင်စီးပြီး လူရှင်းတဲ့ ဆိုင်တစ်ခုကို ရောက်လာတယ်။ 

နေသစ် အတွက် ကျောင်းက လူကြီးတွေကို လာတွေ့ကြရတယ်ဆိုတာ သိထားတော့…

"တောင်းပန်ပါတယ်"

"နေသစ်က ဒီကိစ္စတွေထဲ ခန့်ညီ နာမည်ကို လုံးဝမထွက်လာစေချင်တာ...သူက ခန့်ညီကိုအိမ်နဲ့ ပြဿနာတက်မှာမျိုး မဖြစ်စေချင်ဘူး။ မမလတ်တို့ ဒီနေ့ပဲ သူတို့မေဂျာဌာနမှူးနဲ့ရော ဘောလုံးအသင်းတာဝန်ခံနဲ့ပါတွေ့လာတာ။ ပုံကို စရိုက်တာခန့်ညီ ဆိုတာကိုသူကဘယ်သူ့ကိုမှမသိစေချင်ဘူး"

အာ…နေသစ်က သူ့အိမ်နဲ့ အဆင်မပြေမှာ စိတ်ပူနေတာလား။ အဲ့လို မရှိပါဘူး။ သူပြောလိုက်ရင် မေမေက လက်ခံရမှာပဲ။ လက်မခံချင်လည်း မေမေက ဘာမှလုပ်မရဘူးဆိုတာ သူနဲ့ မေမေနဲ့ စိတ်ထဲကနေ သိနေတဲ့ ကိစ္စ။

မေမေ ကိုကို့ ကိုသာ ထိန်းချုပ်လို့ရမယ်။ သူ့ကို မရဘူးဆိုတာ ငယ်ငယ်လေးတည်းက သူသိနေတယ်။ ဒါ သူနဲ့ မိဘတွေကြားထဲက ဘာမှန်းမသိတဲ့ နားလည်မှုတစ်ခုပဲ။

"ခန့်ညီက ဘာလို့ နေသစ်ကို တာဝန်ယူပေးမယ်ပြောရတာလဲ။ မမလတ်သိသလောက်တော့ နေသစ်က သူ့ဘာသာသူရပ်တည်နိုင်တယ်လေ။ အွန် သားဘာလို့ သူ့ကိုစောင့်ရှောက်ချင်ရတာလဲ"

သူ့ဘာသာသူ စောင့်ရှောက်နိုင်တယ်တဲ့။ သူက နေသစ်အတွက် လူပိုလား။ သူ့မှာ အိမ်ပိုင် မရှိသေးဘူး။ နေသစ် မပူမပင် စားဖို့သောက်ဖို့ အတွက် ပိုက်ဆံလည်း အဲ့လောက်အများကြီးမရှိသေးဘူး။ သူ့မှာ ကိုယ်ပိုင် အလုပ်‌တောင် မရှိသေးဘူး။

"လူတစ်ယောက်က တစ်ယောက်ကိုစောင့်ရှောက်တယ် ဆိုတာ အဲ့လူအပေါ် မေတ္တာအခြေခံလေးရှိလို့ပဲ။ အခု မမလတ် သိရသလောက် ခန့်ညီက အစ်ကိုကို မပေးချင်လို့လေ...ဟုတ်တယ်မလား"

မေတ္တာလား…မိဘတွေလိုတော့ ဘယ်ဟုတ်မလဲ။ နေသစ် နဲ့ သူက အိမ်ထောင်ရေးတစ်ခုလိုပဲလေ။ မမလတ်ပြောတဲ့ မေတ္တာဆိုတာ သူသေချာမသိနေဘူး။ အဲ့ဒါ နားလည်ဖို့ အရမ်းခက်တဲ့ စကားလုံးပဲ။ စိတ်ထားဖို့လည်း ခက်တယ်လေ။ လွယ်လွယ်ကူကူ ဖြစ်တည်လာတဲ့အရာမဟုတ်ဘူး။ နေသစ်ကို အကြောင်းရင်း များစွာနဲ့ သူ တို့ အတူတူ နေထိုင်သွားချင်စိတ်က အဲ့မေတ္တာလို့တော့ တထစ်ချ ပြောမရဘူး။

"အခု...သားအစ်ကိုကိုလည်း နေသစ်ကမနှောင့်ယှက်တော့ဘူးတဲ့ ။ ဒီတော့ သားလည်း နေသစ် ကိုစောင့်မ

ကြည့်လည်းဖြစ်နေပြီမို့...နေသစ်နားမသွားနဲ့တော့နော်။ သား ကို နေသစ်ကသူနဲ့တွဲတွေ့နေတာမျိုး မမြင်စေချင်ဘူးတဲ့"

နေသစ် ပြောပြီးသားတွေ ထပ်မပြောပါနဲ့။ တစ်ခါကြားရုံလောက်နဲ့တင် ဘယ်လောက် နေရခက် ၊ အအိပ်ပျက် ၊ အစားပျက်ရလည်း သူပဲ သိတာမို့…

သူသိပြီးသား။ သူမကြားချင်တာတွေကို ဘာလို့ လာပြောနေရတာလဲ။ ဆေးစစ်ဖို့လည်း ပြောသွားသေးတယ်။

ဘာလဲ။ ဒီခန္ဓာကိုယ်က ဘယ်လောက် သန့်ရှင်းစင်ကြယ်လဲ။ ဘယ်သူမှ လွယ်လွယ်ထိလို့ မရတဲ့ ခန္ဓာကိုယ်မျိုးပါ။

နေသစ်ကရော…သူ့တုန်းကရော…ဘယ်သူက အဲ့လိုတွေ ဂရုစိုက်ပေးခဲ့ကြလို့လဲ။

ဒီအတိုင်း သူ…သေဆုံးခဲ့ရတာ မဟုတ်ဘူးလား။

အခုရော သူက ဘာတွေ ချို့ယွင်းနေလို့လဲ ။ နေသစ်နဲ့ ပတ်သတ်ပြီးတည်းက သူပိုပြီး လိမ္မာ‌အောင်နေတယ်။ နေသစ် မျက်နှာမငယ်ရအောင် ပိုကြိုးစားတယ်။ အဆက်ဆက်မှာ သူက တန်ဖိုးရှိပါတယ်။ အဲ့လောက်ထိ နေသစ် ပြောချင်ရာ ပြော ၊ လုပ်ချင်ရာ လုပ်တာတွေ ငြိမ်ခံနေတာ သူ အောက်ကျလို့မှ မဟုတ်တာ။ နေသစ်နဲ့ အတူတူ နေချင်ရုံပါ။

နေသစ်နဲ့ပဲ နေချင်ရုံပါ။ ဘာလို့ အဲ့လောက်ထိ ခက်ခဲနေရတာလဲ။

***

NEXT