ပီဇာ (Pizza)
အဆွေ့ မှာ အပြစ်အနာအဆာကင်းတဲ့ အသားအရေ ရှိနေလို့ ကောင်းကင်ကြီးက ပိုလှသွားမှာ မဟုတ်ပါဘူး။
အဆွေ့ မှာ Six-pack တွေ ရှိနေလို့ ဂီတက ပိုပြီး စိတ်ဝင်စားဖို့ကောင်းလာမှာ မဟုတ်ပါဘူး။
အဆေွ ကျော်ကြားနေလို့ ခွေးလေးတွေက ပိုပြီး အဖော်မွန်ကောင်း ပီသပေးမှာလည်း မဟုတ်ပါဘူး။
ပီဇာရဲ့ အရသာဟာ အဆေွ ဘယ် ရာထူးအဆင့်အတန်းမှာပဲ ဖြစ်ဖြစ် အရသာ ရှိနေမှာပါပဲ။
ဘဝရဲ့ အကောင်းဆုံး အစိတ်အပိုင်းတွေဟာ ကျွန်တော်တို့ကို လိုချင်တပ်မက်အောင် ဝိုင်းဝန်းတွန်းအားပေးခံနေရတဲ့ အရာတွေရဲ့ အလွန်မှာပဲ တည်ရှိနေတာ ဖြစ်ပါတယ်။
_________________________________________________________________________
စီမံကိန်းအသေးစားလေးတစ်ခု
စူးစမ်းလေ့လာလိုစိတ် ရှိပါ။ အပြင်ထွက်ပါ။ အိပ်ရာဝင်ချိန် မှန်ပါစေ။ ရေများများသောက်ပါ။ ဝမ်းဗိုက်ကနေ အသက်ရှူပါ။ ပျော်ပျော်ရွှင်ရွှင် စားသောက်ပါ။ ကိုယ့်အတွက် လွတ်လပ်မှုအပြည့်ရှိတဲ့ ကိုယ်နဲ့အံဝင်ခွင်ကျဖြစ်တဲ့ နေ့စဉ်ဘဝပုံစံတစ်ခုကို သတ်မှတ်ထားပါ။ ကြင်နာတတ်ပါစေ။ လူတိုင်းက သင့်ကို ကြိုက်မှာမဟုတ်ဘူးဆိုတာကို လက်ခံပါ။ အဆွေ့ ကို တကယ်နှစ်သက်တဲ့သူတွေကို တန်ဖိုးထားပါ။ တခြားသူတွေရဲ့ သတ်မှတ်ချက်တွေထဲမှာ ပိတ်မိမနေပါနဲ့။ အမှားအယွင်းတွေကို ခွင့်ပြုပေးပါ။ ကိုယ့်ဆီမှာ ရှိပြီးသားအရာတွေကိုပဲ မြတ်နိုးတန်ဖိုးထားပါ။ ဘဝကို အနှောင့်အယှက်ပေးမယ့် အရာတွေကို "ဟင့်အင်း၊ နိုး" လို့ ငြင်းပယ်တတ်အောင် သင်ယူပါ။ ပြီးတော့ တကယ်ရှင်သန်စေမယ့် အရာတွေကိုတော့ "ရက်စ်" ဆိုပြီး လက်ခံလိုက်ပါ။
___________________________________________________________________________
လှေကားများ
ကျွန်တော်တို့ဟာ ဘဝကို အမြဲတမ်း အထက်ကို တက်လှမ်းနေရတဲ့ ခရီးတစ်ခုလို မြင်အောင် တွန်းအားပေးခံနေကြရပါတယ်။ "လှေကား" ဆိုတဲ့ စကားလုံးကို သတိမထားမိဘဲ သုံးနှုန်းနေကြတာပါ။ အသက်မွေးဝမ်းကျောင်း လှေကား၊ အိမ်ခြံမြေ ပိုင်ဆိုင်မှု လှေကား... စသဖြင့်ပေါ့။ လှေကားရဲ့ အမြင့်ဆုံးအဆင့်မှာ ရှိနေတာ ဒါမှမဟုတ် အောက်ဆုံးအဆင့်မှာ ရှိနေတာ စတာတွေကို ပြောကြတယ်။ လှေကားအတိုင်း တက်လှမ်းခြင်း၊ မြင့်တက်လာခြင်း၊ တောင်တက်ရသလို ခက်ခဲတဲ့ ရုန်းကန်မှုတွေအကြောင်း ကျွန်တော်တို့ ပြောကြတယ်။
အဲ့ဒီလို ပြောဆိုနေထိုင်ခြင်းအားဖြင့် ကျွန်တော်တို့ဟာ ဘဝကို "အထက်တက်ပွဲ" တစ်ခုလို မြင်ယောင်လာကြပါတယ်။ တိမ်တိုက်တွေကို လှမ်းကိုင်ဖို့ ကြိုးစားနေတဲ့ လူသားမိုးမျှော်တိုက်ကြီးတွေလိုပေါ့။ အဲ့ဒီအခါမှာ ကျွန်တော်တို့ဟာ အနာဂတ်ဆိုတဲ့ အပေါ်ဘက်ကိုပဲ ကြည့်မိတာ ဒါမှမဟုတ် အတိတ်ဆိုတဲ့ အောက်ဘက်ကိုပဲ ငုံ့ကြည့်မိတာမျိုး ဖြစ်လာပြီး... ကျွန်တော်တို့ရဲ့ ဘေးပတ်ပတ်လည်မှာရှိတဲ့ အတိုင်းအဆမရှိ ကျယ်ပြောလှတဲ့ "ပစ္စုပ္ပန်" ဆိုတဲ့ မြေပြင်ကျယ်ကြီးကိုတော့ ဘယ်တော့မှ ငဲ့မကြည့်ဖြစ်ကြတော့ဘူး။
လှေကားတွေရဲ့ ဒုက္ခက... သူတို့မှာ သင့်အတွက် ဘေးဘက်ကို ရွေ့လျားဖို့ နေရာလပ် မရှိတာပါပဲ။ ပြုတ်ကျဖို့အတွက်ပဲ နေရာရှိတာပါ။
Comments
Post a Comment