တောင်တန်း
ပြဿနာတစ်ခုကို ကျော်လွှားနိုင်ဖို့ဆိုရင် အဲ့ဒီပြဿနာကို မျက်နှာချင်းဆိုင် ရင်ဆိုင်ကြည့်ဖို့ လိုအပ်ပါတယ်။ တကယ်မရှိသလိုမျိုး ဟန်ဆောင်နေတဲ့ တောင်တစ်လုံးကို သင် ဘယ်တော့မှ တက်နိုင်မှာ မဟုတ်ပါဘူး။
ချိုင့်ဝှမ်း
သင် စိတ်ဓာတ်ကျနေတဲ့အခါ အဲ့ဒီခံစားချက်တွေကနေ မြစ်ဖျားခံလာတဲ့ အတွေးတွေဟာ ပြင်ပက အရှိတရားတွေ ဒါမှမဟုတ် ခိုင်လုံတဲ့ အချက်အလက်တွေမဟုတ်ဘူးဆိုတာကို သတိပြုမိဖို့ အရေးကြီးပါတယ်။ ဥပမာ - ကျွန်တော့်အသက် ၂၄ နှစ်တုန်းက ကျွန်တော့်ရဲ့ ၂၅ နှစ်မြောက် မွေးနေ့ကို ဘယ်တော့မှ မြင်တွေ့ရတော့မှာမဟုတ်ဘူးလို့ အခိုင်အမာ ယုံကြည်ခဲ့ဖူးတယ်။ ရုတ်တရက် ကြုံတွေ့လိုက်ရတဲ့ စိတ်ပိုင်းဆိုင်ရာ နာကျင်မှုတွေနဲ့ ရက်သတ္တပတ်တွေ လတွေအကြာကြီး ဆက်ပြီး မရှင်သန်နိုင်တော့ဘူးလို့လည်း ကျွန်တော် သေချာပေါက် သိနေခဲ့တယ်။ ဒါပေမဲ့ အခုကြည့်ပါ... အသက် ၄၅ နှစ်အရွယ် ကျွန်တော်ဟာ ဒီစာပိုဒ်ကို ရေးနေနိုင်တုန်းပါပဲ။ စိတ်ဓာတ်ကျခြင်း ဆိုတာ လိမ်ညာတတ်ပါတယ်။
အဲ့ဒီခံစားချက်တွေကတော့ တကယ့်လက်တွေ့ဖြစ်နိုင်ပေမဲ့ အဲ့ဒီခံစားချက်တွေကြောင့် ကျွန်တော်ယုံကြည်မိသွားတဲ့ အရာတွေကတော့ လုံးဝ အမှန်တရားတွေ မဟုတ်ခဲ့ပါဘူး။
ကျွန်တော် ဘာကြောင့် ဒီလို အဆုံးစီရင်ချင်လောက်အောင် စိတ်ဓာတ်ကျခဲ့ရလဲဆိုတာကို ကိုယ်တိုင်လည်း သေချာနားမလည်ခဲ့တဲ့အတွက် ဒီထဲကနေ ဘယ်တော့မှ ပြန်ထွက်နိုင်မှာမဟုတ်ဘူးလို့ စိတ်ကူးခဲ့မိတယ်။ စိတ်ဓာတ်ကျခြင်းထက် ပိုပြီးကြီးမားတဲ့အရာတစ်ခု ရှိနေတယ်ဆိုတာကို ကျွန်တော် သတိမထားမိခဲ့ဘူး။ အဲ့ဒီအရာကတော့ အချိန် ပါပဲ။ အချိန်ဟာ စိတ်ဓာတ်ကျခြင်းက ပြောတဲ့ အလိမ်အညာတွေကို မှားယွင်းကြောင်း သက်သေပြပေးပါတယ်။ စိတ်ဓာတ်ကျခြင်းက ကျွန်တော့်အတွက် ကြိုတင်တွေးတောထားတဲ့ အရာတွေဟာ ကြိုတင်နိမိတ်ဖတ်ချက်တွေ မဟုတ်ဘဲ မှားယွင်းတဲ့ အယူအဆတွေ သာဖြစ်ကြောင်း အချိန်က ကျွန်တော့်ကို ပြသပေးခဲ့ပါတယ်။
ဒါဟာ အချိန်က စိတ်ကျန်းမာရေးပြဿနာအားလုံးကို အလိုအလျောက် ပျောက်ကွယ်သွားစေတယ်လို့ ဆိုလိုတာမဟုတ်ပါဘူး။ ဒါပေမဲ့ ကျွန်တော်တို့ရဲ့ စိတ်အပေါ်ထားတဲ့ သဘောထားနဲ့ ချဉ်းကပ်ပုံတွေဟာ ပြောင်းလဲသွားနိုင်ပြီး စိတ်ပျက်အားငယ်မှုနဲ့ ကြောက်ရွံ့မှုတွေက မပေးနိုင်တဲ့ အမြင်သစ် တွေကို ရရှိဖို့အတွက် အချိန်တစ်ခုလောက်အထိ တောင့်ခံရှင်သန်နေဖို့ လိုတယ်လို့ ဆိုလိုတာပါ။
လူတွေက စိတ်ကျန်းမာရေးနဲ့ ပတ်သက်ရင် တောင်ထိပ်တွေနဲ့ ချိုင့်ဝှမ်းတွေအကြောင်း ပြောလေ့ရှိကြတယ်။
ဒီလို မြေမျက်နှာသွင်ပြင်ဆိုင်ရာ တင်စားချက်တွေက အဓိပ္ပာယ်ရှိပါတယ်။ ဘဝရဲ့ မတ်စောက်တဲ့ အဆင်း အတက်တွေအတွက် ရုန်းကန်ရမှုတွေကို အဆွေ မှန်တကယ် ခံစားရနိုင်ပါတယ်။ ဒါပေမဲ့ တစ်ခုအရေးကြီးတာက ချိုင့်ဝှမ်းရဲ့ အောက်ခြေမှာ ရှိနေချိန်မှာ အမြင်က ဘယ်တော့မှ ရှင်းလင်းပြတ်သားမှု မရှိနိုင်ဘူးဆိုတာပါပဲ။ တစ်ခါတလေမှာ တစ်ဖန်ပြန်ပြီး မြင့်တက်လာနိုင်ဖို့ မိတ်ဆွေလုပ်ရမယ့် တစ်ခုတည်းသော အရာကတော့ ရှေ့ကိုသာ ဆက်ပြီး ရွေ့လျားနေဖို့ပဲ ဖြစ်ပါတယ်။
Comments
Post a Comment