မရေရာမှုက ပေးသော စိတ်သက်သာရာ
မရေရာမှုတွေဟာ ကျွန်တော်တို့ရဲ့ စိုးရိမ်ပူပန်မှု (Anxiety) ကို အစာကျွေးနေတာပါ။ မရေရာမှုနဲ့ စိုးရိမ်ပူပန်မှုဟာ ခွဲထုတ်လို့မရအောင် ဆက်စပ်နေပါတယ်။ ကျွန်တော်တို့ စိုးရိမ်စိတ် ပိုများလေလေ၊ မရေရာတဲ့ အခြေအနေတွေကို သည်းခံဖို့ ပိုခက်ခဲလေလေပါပဲ။ အဲ့ဒီအခါမှာ ကျွန်တော်တို့ဟာ စာရင်းတွေ အထပ်ထပ်ရေးမယ်၊ သူတစ်ပါးကို အလုပ်လွှဲမပေးဘဲ ကိုယ်တိုင်ပဲ အတင်းချုပ်ကိုင်မယ်။ သူများဆီကနေ "အဆင်ပြေပါတယ်" ဆိုတဲ့ စိတ်ချရတဲ့စကားကို ခဏခဏ နားထောင်ချင်နေမယ်။ တံခါးပိတ်ခဲ့ရဲ့လားလို့ အကြိမ်ကြိမ် ပြန်စစ်မယ် ။ တစ်ဖက်လူ အဆင်ပြေရဲ့လားလို့ ဖုန်းတွေ ထပ်ခါတလဲလဲ ဆက်မယ်။
ကျွန်တော်တို့ဟာ အရာရာကို အတင်းထိန်းချုပ်ချင်လာပြီး သူတစ်ပါးကို မယုံကြည်နိုင်တော့ဘူး။ ကြောက်စရာကောင်းတဲ့ လောကကြီးကနေ ထွက်ပြေးပြီး အိမ်ထဲမှာပဲ ပုန်းနေချင်မယ်။ အလုပ်တွေကို ရွှေ့ဆိုင်းထားမယ်။ ဒါမှမဟုတ်လည်း အာရုံလွှဲစရာ ကိစ္စတွေထဲမှာ ကိုယ့်ကိုယ်ကိုယ် နှစ်မြှုပ်ထားမယ်။ တစ်နေ့တာရဲ့ စက္ကန့်တိုင်းကို အလုပ်တွေ၊ အပျော်အပါးတွေ၊ ဒါမှမဟုတ် တခြားသော စွဲလမ်းမှုတွေနဲ့ အတင်းဖြည့်ထားမိလိမ့်မယ်။
ဒါပေမဲ့ ဒီအရာတွေက တကယ့်အရင်းအမြစ် ပြဿနာကို မဖြေရှင်းနိုင်ပါဘူး။ မရေရာမှုကတော့ ရှိနေဆဲပါပဲ။ နောက်ဆုံးမှာတော့ မရေရာမှုကို ကိုင်တွယ်နိုင်မယ့် တစ်ခုတည်းသော နည်းလမ်းက "မရေရာမှုကို လက်ခံလိုက်ခြင်း" သာ ဖြစ်ပါတယ်။ ဘာလို့လဲဆိုတော့ ကျွန်တော်တို့ အဲ့ဒါကနေ ထွက်ပြေးလို့ မရလို့ပါ။ ဘယ်လောက်ပဲ အချိန်ဇယားတွေ၊ ပြက္ခဒိန်တွေနဲ့ သေချာအောင် လုပ်ထားပါစေ။ မရေရာမှုကတော့ ရှိနေဦးမှာပါ။ ဒီလောကကြီးဟာ ခေါင်းမာလှတဲ့ "မရေရာမှုတွေ" နဲ့ တည်ဆောက်ထားတာဖြစ်လို့ ကျွန်တော်တို့ ဒါကို ရင်ဆိုင်ရပါမယ်။
ဒါကို ရင်ဆိုင်နိုင်တဲ့ နည်းလမ်းတစ်ခုကတော့ "မရေရာမှုရဲ့ တန်ဖိုး" ကို မြင်အောင်ကြည့်ဖို့ပါပဲ။ မရေရာမှုဆိုတာ ကျိန်စာတစ်ခု မဟုတ်ဘဲ မျှော်လင့်ချက်ရဲ့ မြစ်ဖျားခံရာလည်း ဖြစ်နိုင်ပါတယ်။ ဟုတ်ပါတယ်... မရေရာမှုကြောင့် ကျွန်တော်တို့ မျှော်လင့်ထားတဲ့ အကောင်းတွေက ထင်သလောက် ဖြစ်မလာတာမျိုး ရှိနိုင်သလို ကျွန်တော်တို့ အရမ်းကြောက်နေတဲ့ အဆိုးတွေကလည်း ထင်သလောက် ကြောက်စရာ မကောင်းတာမျိုး လည်း ဖြစ်နိုင်ပါတယ်။
ဥပမာအားဖြင့် "ကံကောင်းခြင်းတွေက အသွင်ပြောင်းပြီး ရောက်လာတတ်တယ်" (Blessings in disguise) ဆိုတဲ့ စကားကို သင် ဘယ်နှစ်ကြိမ် ကြားဖူးသလဲ။ တစ်စုံတစ်ယောက်က ရောဂါဖြစ်တာ၊ အလုပ်ပြုတ်တာ၊ ဒါမှမဟုတ် စီးပွားပျက်တာမျိုးလို အဆိုးဆုံး ကံကြမ္မာနဲ့ ကြုံရပြီးမှ... နောက်ဆုံးမှာ အဲ့ဒီအဖြစ်အပျက်ကြောင့်ကျေးဇူးတင်တတ်သွားတာမျိုးကိုရော သင် ဘယ်နှစ်ကြိမ် ကြားဖူးသလဲ။
ကျွန်တော့်ဘဝရဲ့ အနက်ရှိုင်းဆုံး နာကျင်မှုတွေဟာ ကျွန်တော့်အကြောင်း ကျွန်တော် အသိဆုံးဖြစ်ခဲ့ရတဲ့ အခိုက်အတန့်တွေပါပဲ။ စက္ကူပေါ်မှာတော့ ကောင်းမွန်လှတဲ့ အားလပ်ရက် ခရီးစဉ်တွေ၊ အလုပ်အကိုင်တွေ၊ အိမ်ထောင်ရေးတွေက တကယ်တမ်းမှာတော့ ဆိုးရွားသွားနိုင်သလိုပဲ... ဘဝရဲ့ ခက်ခဲတဲ့ အရာတွေဟာလည်း သင်ခန်းစာတွေ၊ မျှော်လင့်ချက် အလင်းတန်း (Silver linings) တွေ ဒါမှမဟုတ် အမြင်သစ်တွေနဲ့အတူ ရောက်လာတတ်ပါတယ်။
ဒါကြောင့် ကျွန်တော်တို့က မရေရာမှုကို အဆိုးတွေ ဖြစ်လာနိုင်လို့ "မလိုချင်စရာ" အဖြစ် မြင်ကြပေမဲ့... တကယ်တမ်းမှာတော့ မရေရာမှုဟာ အဆိုးတွေကနေ ကျွန်တော်တို့ကို ကာကွယ်ပေးထားတဲ့ "အကာအကွယ်" တစ်ခုလည်း ဖြစ်ပါတယ်။ ဘာလို့လဲဆိုတော့ လူ့ဘဝမှာ တစ်ချိန်မဟုတ် တစ်ချိန်တော့ အဆိုးတွေ ဖြစ်လာမှာပဲလေ။ အဲ့ဒီအဆိုးတွေက နောက်ဆုံးမှာ ဘာကို ဆိုလိုသွားမလဲ။ ဘယ်ကို ဦးတည်သွားမလဲ။ ဘာတွေကို ထုတ်ဖော်ပြသသွားမလဲဆိုတဲ့ "မရေရာမှု" ကသာလျှင်... ကျွန်တော်တို့ကို ပိုပြီး ကြံ့ခိုင်တဲ့ မျှော်လင့်ချက်မျိုး ရှိစေတာပါ။
"အဆိုးတွေ မဖြစ်ပါစေနဲ့" လို့ ဆုတောင်းတဲ့ မျှော်လင့်ချက်မျိုး မဟုတ်ဘဲ "အဆိုးတွေဆိုတာ ဇာတ်လမ်းတစ်ခုလုံး မဟုတ်ဘူး" လို့ မြင်နိုင်စွမ်းရှိတဲ့ မျှော်လင့်ချက်မျိုးပေါ့။ အဆိုးတွေမှာလည်း အကောင်းတွေလိုပဲ မရေရာတဲ့ ရလဒ်တွေ အများကြီး ရှိနေလို့ပါပဲ။
အတိုချုပ်ပြောရရင်... ကျွန်တော်တို့ ဘာမှ ကြိုမသိနိုင်ပါဘူး။ တစ်ခုတည်းသော သေချာမှုကတော့ "မသေချာခြင်း" (Uncertainty) ပါပဲ။ ဒါကြောင့် ကျွန်တော်တို့ တကယ်ပဲ စိတ်အေးချမ်းချင်တယ်ဆိုရင် မရေရာမှုထဲမှာတင် အေးချမ်းမှုကို ရှာဖွေရပါလိမ့်မယ်။ အဲ့ဒီမှာ အေးချမ်းမှုက ရှိနေပါတယ်။ ဘာလို့လဲဆိုတော့ အရာရာက မရေရာနေသရွေ့ လမ်းတွေ ပိတ်မသွားသေးလို့ ပါပဲ။ ကျွန်တော်တို့ဟာ မျှော်လင့်ချက်တွေ၊ အတိုင်းအဆမဲ့တဲ့ အခြေအနေတွေနဲ့ အဖြေမရှိသေးတဲ့ ဘဝရဲ့ ပဟေဠိတွေကြားမှာ လွတ်လပ်စွာ ရှင်သန်နိုင်ပါတယ်။
TN // ဒါလည်း မီအရမ်းကြိုက်တဲ့ အတွေးအခေါ်ပေါ့။ ဘယ်အရာမှ မမြဲဘူး။ ဒါပေမဲ့ ရိုးရှင်းစွာနဲ့ ပျော်ရွှင်တတ်အောင် နေမယ် ဆိုတာ...Finding joy in simplicity လေ
Comments
Post a Comment